Алматыда жол қауіпсіздігіне ерекше көңіл бөлінген , – деп хабарлайды aqshamnews.kz тілшісі.
Қала көшелерінде жол қауіпсіздігін арттыруға бағытталған жұмыстар жүйелі түрде атқарылып жатыр. Бұған дейін полиция қызметкерлері көлік қозғалысы жоғары учаскелерде тексеру жүргізіп, жол белгілерінің жай-күйіне, жол таңбаларының сапасына, сондай-ақ жол инфрақұрылымының көріну деңгейіне көңіл бөлген болатын. Нәтижесінде коммуналдық қызметтерге жол белгілерін жаңарту, жол таңбаларын қалпына келтіру және жол қозғалысына қатысушылардың көрінуіне кедергі келтіретін ағаш бұтақтарын қырқу жұмыстары тапсырылды. Бүгінде 1 400-ден астам жол белгісі жаңартылып, 20 мың шақырымнан астам жол таңбасы сызылды.
Одан бөлек жол-көлік қауіпсіздігі мен тиімділігін арттыру мақсатында 2025 жылы қаладағы 10 көше қиылысында «вафельді» жол белгісі пайда болды. Арнайы тор жолдар қиылыстың реттелетін аймағын көрсетіп, кептеліс кезінде жолды бөгеп қалудың алдын алады. Бұл шешім қазір өз тиімділігін көрсетіп отыр.
Сондай-ақ қаладағы кейбір көше қиылыстарында жаяу жүргіншілерге арналған жеке бағдаршам фазасы енгізілді. Тізімде Назарбаев даңғылы – Гоголь көшесі, Абылай хан даңғылы – Гоголь көшесі, Достық даңғылы – Абай даңғылы, Сейфуллин даңғылы – Мақатаев көшесі, Абай даңғылы – Алтынсарин даңғылы жол қиылыстары бар. Пилоттық жоба жолдардың өткізу қабілетіне оң әсерін етіп, жаяу жүргіншілердің жолдан қауіпсіз өтуін қамтамасыз етіп отыр.