Алматыда қалдық өңдеп, электр қуатын өндіретін зауыт салу жобасы құрылыс-монтаж жұмыстарына дайындықтың соңғы кезеңіне жетті, – деп хабарлайды aqshamnews.kz тілшісі.
Жоба Алатау ауданында қытайлық Junxin Environmental Protection компаниясының қатысуымен қолға алынған. Инвестиция көлемі 280 млн АҚШ долларынан асады (шамамен 130 млрд теңге).
Кәсіпорынның қуаты тәулігіне 2 мың тоннаға дейін қалдық өңдеуге жетеді, қаланың энергетикалық жүйесіне 60 МВт-қа дейін электр қуатын өндіреді.
Қазіргі кезеңде дайындық жұмыстары аяқталды: Қазақстан Республикасы Экология және табиғи ресурстар министрлігімен инвестициялық келісім жасалып, қалдық жеткізу және өндірілетін электр қуатын энергожүйеге беру бойынша негізгі келісімдер бекітілді.
Жоба халықаралық экологиялық стандарттарға сәйкес келетін заманауи автоматтандырылған газтазарту жүйелерімен жабдықтауды көздейді.
Құрылыс кезеңінде шамамен 700 жұмыс орны ашылады, ал нысан пайдалануға берілгеннен кейін 120-ға жуық тұрақты жұмыс орны құрылмақ.
Аталған жобаны жүзеге асыру полигондарға түсетін жүктемені азайтып, қалдық көлемін қысқартуға және оларды қайта өңдеу арқылы қосымша электр қуатын өндіруге мүмкіндік береді.
Еске сала кетейік, 2025 жылы 29 тамызда Қазақстан Республикасы Экология және табиғи ресурстар министрлігі мен Junxin Environmental Protection компаниясы арасында Алматы қаласында электр қуатын өндіретін қоқыс өңдеу зауытын салу жөніндегі инвестициялық келісімге қол қойылған болатын. Аталған компания «жасыл» энергетика және қалдық өңдеу саласындағы ірі операторлардың бірі саналады, 455 патентке ие және осы бағыттағы жобаларды жүзеге асыруда мол тәжірибесі бар.