Алматының Жетісу ауданында тұрғындардың шағымынан кейін заңсыз сауда нүктелеріне қатысты рейд жүргізілді, деп хабарлайды Aqshamnews.kz қала әкімдігіне сілтеме жасап.
Тексеру Солтүстік айналма көшесінің бойында, «Байсат» және «Ялян» сауда орталықтарының маңында өтті. Тұрғындардың айтуынша, жол жиегіндегі бейберекет сауда көлік қозғалысына кедергі келтірген.
Рейд барысында аумақты абаттандыру талаптарын бұзғаны үшін 24 хаттама, ал белгіленбеген жерде сауда жасағаны үшін тағы 15 хаттама толтырылды.
Бұған дейін әкімдік жыл басынан бері Алматыда 1211 адам қатысқан 45 заңсыз сауда ошағы анықталғанын хабарлаған. Қазіргі таңда оның 27-сі жойылған.
Қала билігі барахолка аумағындағы заңсыз сауда нысандарын ретке келтіру мәселесін бұған дейін де көтерген. Мамандардың мәліметінше, мұндай нысандарда қауіпсіздік талаптарының сақталмауы өрт қаупін арттырады.