Алматыда заңсыз салынған кезекті нысан сүрілді, - деп хабарлайды aqshamnews.kz.
Алматының қала құрылысын бақылау басқармасының мәліметінше, Қарасай батыр мен Жұмалиев көшелерінің қиынысындағы үйде өз бетінше салынған қосымша нысан сот шешімі бойынша сүріледі.
Тұрғындардың өтініші негізінде жүргізілген жоспардан тыс тексеру барысында меншік иесінің (жеке тұлғаның - еск.) рұқсат құжаттарының жоғына қарамастан қосалқы және кіреберіс нысандарды салғаны анықталды.
Меншік иесіне қатысты әкімшілік шаралар қабылданды. Ол Алматы қаласының әкімшілік құқықбұзушылықтар жөніндегі мамандандырылған ауданаралық сотының қаулысымен кінәлі деп танылып, әкімшілік айыппұл арқалады. Заңсыз тұрғызылған құрылыс мәжбүрлеп бұзу ұйғарымымен сүрілетін болды.
Алматы қалалық сотының 2025 жылғы 13 қаңтардағы қаулысымен бірінші сатыдағы шешім өзгеріссіз қалды.
Сот шешімін орындау барысында нысанды меншік иесінің өзі бұзды.