Алматы қаласы бойынша Қылмыстық-атқару жүйесі департаментіне қарасты №11 мекеменің мамандары мен Туризм және қонақжайлық индустрия колледжінің өкілдері бірлесіп «Заңға бағынған құл болмайды» деген тақырыпта семинар өткізді.
№11 мекеменің режим және күзет бөлімі, мекеме бастығының кезекші көмекшісі әділет майоры Анар Мустафаев, Туризм және қонақжайлық индустрия колледжінің директоры Нұрдәулет Жабықбаев, Алмалы ауданының Ювеналды полиция полковнигі Қолқанат Аяғанов, педагог-психологтар Эльмира Үсенқызы, Гүлнар Бексұлтанқызы, сонымен қатар Алматы қалалық Психикалық денсаулық орталығының нарколог-дәрігері Анна Трубникова, Жастар денсаулық орталығын дамыту бойынша ресурстық орталығының клиникалық психологы Елена Акчалова және ата-аналар комитетінің мүшелері қатысты.
Семинарда жасөспірімдер тарапынан жиі жасалатын құқық бұзушылығы туралы, жасөспірімдердің ауытқушылық және девиантты мінез-құлқының алдын-алу мәселелері талқыланды. «Есірткі және психотроптық заттарды таратқаны және пайдаланғаны үшін қылмыстық жауакершілік» жайында да сөз қозғалды. Сонымен қатар кәмелеттік жасқа толмаған балалардың қылмыстық жаупкершілігі туралы талқыланды. Жасөспірімдердің психикалық денсаулығы, балаға зиян келтірмей қиын жағдайдан қалай шығуға болады деген тақырып төңірегінде де әңгіме қозағалды.
«Бұл басқосу Мемлекет басшысының елімізде «Заң және тәртіп» қағидатын біржола орнықтыру туралы тапсырмасына үн қосу мақсатында ұйымдастырылды. Иә, жастарға заң мен тәртіп туралы ұдайы әңгімелеп отырудың артықтығы жоқ. Қазір олардың осынау қызылды-жасылды өмірге құмартып жалындап тұрған шағы. Сондықтан құқықтық тәрбие олардың болашақта заң бұзбай, қылмысқа ұрынбай, жақсы өмір сүруіне, қоғамнан өз орнын табуына ықпал етері сөзсіз. «Дөңгелек үстел» басында жиналған мамандар өзекті мәселелерді талқылап, жастардың құқықтық сауаттылығын арттыру және әділ және тұрақты қоғам құрудың негізі «Заң және тәртіп» екені айтылды», – дейді №11 мекеменің тәрбие бөлімі қызметкері Еркегүл Жеңісхан.