Ықылас атындағы Халық музыкалық аспаптар музейінде Bere banda атты студенттік ұжымның концерті өтті, деп хабарлайды aqshamnews.kz
Кеш қонақтары дәстүрлі венгр музыкасын тамашалады. Венгрияның Алматыдағы Бас консулы Саболч Карой Сёке мырза концертте сөз сөйлеп:
«Қазақстан мен Венгрияны көптеген нәрсе байланыстырады. Біздің басты мақсатымыз – мәдени дәстүрлерді сақтау және екі ел арасындағы достықты нығайту. Музыканттарымызды жылы қабылдап, жүректеріңізде сақтаңыздар», – деді.
Ансамбль мүшелері вольта, лютня, электрондық кларнет, скрипка, флейта және аккордеон аспаптарымен камералық композициялар орындады. Олардың өнерін тыңдауға әр жастағы адамдар, оның ішінде Құрманғазы атындағы Қазақ ұлттық консерваториясы мен Жүргенов атындағы Қазақ ұлттық өнер академиясының студенттері мен оқытушылары келді.
Кеш барысында музыканттар тек концерт беріп қана қоймай, ескі музыкалық аспаптарды қалпына келтіру жайлы айтып, алматылық әріптестерімен тәжірибе алмасты. Сонымен қатар, жиналғандар «Қазақстанның көшпенділері: өткен және қазіргі» көрмесін ұйымдастыру мәселелерін талқылады. Бұл көрмені Венгрияда өткізу жоспарланған, оның мақсаты — елдер арасындағы тарихи байланыстарды одан әрі нығайту.
Қазіргі Венгрия аумағында XIII ғасырдың бірінші жартысында Торғай даласынан көшіп барған қыпшақ тайпаларының ұрпақтары тұрады. Сондықтан қазақстандық және венгр ғалымдары ортақ тарихи тамырларды зерттеуге ерекше қызығушылық танытып отыр. Бұл байланыстардың заманауи куәгері ретінде Будапешттегі Абай ескерткіші мен Астана көшесінің ашылуы айтуға тұрарлық.