Алматыда Президент тапсырмасы аясында «жұртқа жақын полиция» жаңа форматы бойынша кешенді шаралар қабылданып жатыр, деп хабарлайды Аlmaty-akshamy.kz.
«Жұртқа жақын полиция» қағидатын жүзеге асыратын басым буын – учаскелік полиция инспекторлары. 2020 жылы инспекторлардың саны небәрі 480 болатын. Біздің шаһар үшін жеткіліксіз еді. Сондықтан, өткен жылы әкімдіктің қолдауымен 113 учаскелік полиция көмекшісі учаскелік инспектор лауазымына ауыстырылды. Осылайша, бүгінде қалада 593 учаскелік инспектор жұмыс істейді, бұл құқық бұзушылықпен күрестің тиімділігін айтарлықтай арттырады», – деді Алматы қалалық полиция департаментінің бастығы Қанат Таймерденов.
Сонымен қатар, былтыр 3 жылдық жоспар бекітілді. Онда полицияның учаскелік пункттері үшін 29 ғимаратты кезең-кезеңімен алу көзделген. Жаңа тұрғын үй кешендерінен 9 бөлме сатып алынды.
«Бүгінде учаскелік инспекторлар мобильді және үнемі байланыста. Әрбір учаскелік полиция қызметкері ПИК-пен және аудан тұрғындарымен чат, мессенджер арқылы байланыс орнатқан. Барлық сұрақтар оларға тікелей жолданады. Осы тәсілдің арқасында біз тұрғындардан түсетін өтініштердің санын 2,5 есеге қысқарттық. Сонымен қатар, барлық аудандық полиция бөлімдерінде фронт-кеңселер жұмыс істейді. Азаматтарға ашық болу үшін барлық шараларды қолданып отырмыз. Мемлекет басшысының тапсырмасын орындау мақсатында өткен жылы барлық тергеуші, анықтаушы мен жедел уәкілдердің кабинеттеріне бейнебақылау камераларын орнаттық. Енді биыл барлық учаскелік полиция пункттерінде бейнекамералар орнатылады», - деді Алматының бас полицейі.