20–29 қаңтар аралығында Алматы қаласында "Тұрмыс" атты жалпы қалалық жедел-алдын алу іс-шарасы ұйымдастырылып жатыр. Бұл отбасылық-тұрмыстық қатынастардағы құқықбұзушылықтардың алдын алу және жолын кесу мақсатындағы профилактикалық іс-шара.
Іс-шара барысында Медеу ауданы Полиция басқармасының қызметкерлері тұрғын үй секторында профилактикалық аралау жұмыстарын жүргізіп, есепте тұрған тұлғаларды тексеріп жатыр, сондай-ақ тұрғындар арасында құқықтық түсіндіру және алдын алу бағытындағы жұмыстарды жүзеге асырып жатыр.
Отбасылық-тұрмыстық зорлық-зомбылық фактілері анықталған жағдайда, заңнамаға сәйкес тиісті шаралар қабылданады. Іс-шараның басты мақсаты – азаматтардың құқықтары мен заңды мүдделерін қорғау, отбасылық-тұрмыстық қатынастар саласындағы құқық бұзушылықтардың алдын алу және халықтың құқықтық мәдениетін арттыру.
Медеу ауданы Полиция басқармасының 2025 жылғы қорытындысы бойынша отбасылық-тұрмыстық қатынастар саласында 780 тұлғаға қорғау нұсқамасы шығарылып, 121 тұлғаға ерекше талап белгіленіп, профилактикалық есепке алынған. Сонымен қатар, сот шешіміне сәйкес 6 тұлғаға психологиялық көмек көрсетілген.
Отбасылық-тұрмыстық зорлық-зомбылыққа қарсы күрес бөлімшесінің инспекторлары аталған профилактикалық жұмыстар 2026 жылы да жалғасын табатынын және оң нәтижеге қол жеткізуге бағытталатынын атап өтті.