Алматы қаласында халыққа жедел құқықтық көмек көрсетуге бағытталған «Заң және тәртіп» ауқымды жобасы жалғасуда, – деп хабарлайды aqshamnews.kz тілшісі.
Жоба аясында мегаполистің барлық ауданында қала тұрғындарына арналған тегін құқықтық кеңестер ұйымдастырылды. Ашық есік күні форматында өткен қабылдаулар барысында алматылықтар прокурорларға, полиция қызметкерлеріне және кәсіби заңгерлерге тікелей жүгініп, өздерін толғандырған сауалдарына жауап алды.
Іс-шараның негізгі мақсаты – тұрғындарға күрделі құқықтық мәселелерді түсіндіру, заң аясында шешу жолдарын көрсету және азаматтардың құқықтық сауаттылығын арттыру. Мамандардың айтуынша, мұндай қабылдаулар халық арасында сұранысқа ие болып, дәстүрлі түрде тұрақты өткізіліп келеді.
Алматы қаласы Әділет департаментінің ресми өкілі Шынар Абзелбектің айтуынша, ашық есік күндері ай сайын қаланың барлық ауданында ұйымдастырылады. Бұл тұрғындарға тегін кеңес алып қана қоймай, құқықтық білімін арттыруға мүмкіндік береді.