Алматы қаласының Антитеррористік комиссиясы ұйымдастыруымен дін саласындағы ақпараттық-түсіндіру топтарының мүшелеріне арналған оқыту семинары өтті.
Мақсаты – терроризмнің алдын алу ісінде еңбек етіп жүрген мемлекеттік орган қызметкерлері, дінтанушылар, теологтар және тарихшылардың кәсіби біліктілігін арттыру.
Семинар барысында ақпараттық-түсіндіру жұмысындағы негізгі мәселелер, жеке тұлғаға психологиялық әсер ету формалары мен әдістері, діни экстремизм мен терроризмге ақпараттық қарсы іс-қимыл, сөйлеу мәдениеті, деструктивті діни ағым өкілдерімен профилактикалық жұмыстың психологиялық және теологиялық қырлары сияқты тақырыптар талқыланды.
Практикалық сабақтарда қатысушылар шешендік өнер мен сендіру әдістерін, аудиториямен тиімді байланыс орнату жолдарын, актерлік шеберлікті қолдану тәсілдерін меңгерді. Сонымен бірге, заманауи коммуникация трендтері, презентация әзірлеу, сөз құрылымын жоспарлау және кері байланыс ұйымдастыру дағдылары да көрсетілді. Жалпы, семинар ақпарат алмасуға, тәжірибе бөлісуге және терроризм профилактикасымен айналысатын мамандардың кәсіби деңгейін көтеруге ықпал етті.