Алматы қаласында терроризмге қарсы дайындықты арттыру мақсатында бірқатар оқу-жаттығу іс-шаралары өткізілді.
Атап айтқанда, 16-26 мамыр аралығында Алматы қаласы бойынша ҰҚКД Терроризмге қарсы орталығы (АТЦ) мамандарының ұйымдастыруымен арнайы батальон, патрульдік полиция полкі және аудандық полиция басқармаларының кезекші қызметкерлерімен теориялық сабақтар өтті, деп хабарлайды aqshamnews.kz.
Сабақтардың негізгі тақырыбы – терроризм қаупі туындағанда немесе лаңкестік акт жасалған жағдайда мемлекеттік органдар мен қызметтердің алғашқы әрекет ету алгоритмі болды. Іс-шараның басты мақсаты – Алматы қалалық терроризмге қарсы жедел штабының (АГОШ) күштері мен құралдарының әрдайым дайын болуын қамтамасыз ету.
Оқу шараларына барлық сегіз аудандық полиция басқармасына қарасты патрульдік полиция полкі мен арнайы батальонның 400-ден астам қызметкері қамтылды. Қатысушыларға алғашқы әрекет етуші күштердің алгоритмі мен кезекші қызметтердің әрекет тәртібі толық түсіндірілді.
Сонымен қатар, патрульдік полиция қызметкерлеріне терроризм актісі орын алған жағдайда экипаждың негізгі әрекеттері, жарылғыш зат немесе күдікті нысан табылғанда эвакуация және қоршау аймақтарын анықтау бойынша ұсыныстар берілді.
Алынған білім мен дағдыларды пысықтау мақсатында жыл соңына дейін патрульдік полиция полкі мен арнайы батальон экипаждарының функционалдық міндеттерді білу деңгейін тексеретін бақылау шаралары жоспарланған.
Жалпы, мұндай шаралар алғашқы әрекет етуші күштердің кәсіби дайындығын арттыруға және терроризм актілерінің алдын алу мен салдарын азайтуға елеулі үлес қосады.
Айта кетейік, аталған мерзім ішінде бұл оқу-жаттығулар Төтенше жағдайлар департаментінің барлық аудандық басқармаларында да өткізілді.