Алматыда Республика күніне орай кинологиялық іс-шара — «Қазақы тазы» моно тұкымды көрмесі және ұлттық дәрежедегі Қазақстан кинологтар одағының қубогы өтіп жатыр. Іс-шараны «Қазақстан кинологтар одағы» республикалық қоғамдық бірлестігі ұйымдастырды.
Қазақстан кинологтар одағының президенті Бауыржан Серікқалидің айтуынша, қазақы тазы — Қазақстанның мәдени мұрасы ретінде танылған ерекше тұқым. Ал 2024 жылы Халықаралық кинологиялық федерация қазақ тазысын алдын ала ит тұқымы ретінде тану туралы шешім қабылдады.
- Қазір біз сапалы тазылардың санын көбейтуге арналған бағдарлама бойынша дұрыс келе жатырмыз. Олардың саны өсіп келеді. Тазының халықаралық деңгейде мойындалуы - еліміз үшін маңызды оқиға. Енді өзге мемлекеттер бұл тұқымды өзіне ала алмайды. Сондай-ақ дүниежүзі тазы тұқымын жақсырақ тани түсті, - деді ол.
Моно тұқымды көрмеде еліміздің әр өңірінен келген 60-тан астам тазы қатысып жатыр. Бағдарлама тазының тұқымын жан-жақты бағалауға бағытталған. Иттер бекітілген стандарттарға сәйкес тексеріледі де, ұлттық және халықаралық санаттағы төрешілер шешімі бойынша үздіктері анықталады.
Көрмеге арнайы иттерін қатыстырып отырған Дәурен Жұмағалиев тазының ерекшелігі туралы айтты.
- Оқушы кезде атамыздың жанында жүріп, оның екі тазысына қызығатын едім. Өсе келе осы іспен айланыса бастап, қазір 20 шақты тазым бар. Мінездері әртүрлі болады - сабырлы, ойынқұмар, қарулы, жүйрік және басқа да. Бірақ ешқайсысында сұғанақтық болмайды. Ақылды әрі алғыр, иісі болмайтын таза жануар. Адамды тістемейді. Бөтен адам келсе, үреді де ұясына кіріп кетеді - ақылдығы сонда. Сонымен қатар Тазыны байлап қоюға болмайды, көлікпен, атпен түзге шығарып тұру керек. Жүгіріп тұрса, бабында болады. Бір орында отыра берсе, тез семіріп, майтабан болады, - деді Дәурен Жұмағалиев.