5 маусым — Дүниежүзілік қоршаған ортаны қорғау күніне орай Алматы мемлекеттік бизнес колледжі мен Іле Алатау ұлттық табиғи паркінің Медеу филиалы бірлесе отырып, ерекше форматта экологиялық шара өткізді. «Таза Табиғат» деп аталған бұл іс-шара эко-квест түрінде ұйымдастырылып, жастардың экологиялық сана-сезімін арттыруды көздеді.
Квестке 100-ге жуық студент, колледж әкімшілігі, оқытушылар, орманшылар мен эколог мамандар қатысты. Қатысушылар төрт командаға бөлініп, төрт түрлі бекеттен тұратын байқауда бақ сынасты. Әр кезең қоршаған ортаны қорғауға бағытталған нақты іс-әрекеттерге негізделді:
- «Жина — жеңіске жет» бөлімінде қатысушылар орман аумағынан қоқыс жинап, тазалыққа үлес қосты;
- «Эко-викторинада» табиғат пен экологияға қатысты сұрақтарға жауап берді;
- «Эко-селфи» бекетінде табиғат аясында креативті суретке түсіп, әлеуметтік желіде экосана туралы үндеу жасады;
- «Қайта өңде де жең» тапсырмасында жиналған қалдықтарды қайта өңдеу жолдарын ұсынды.
Командалар арасында тартысты бәсеке өтіп, ұпайлар есептеліп, жеңімпаздарға грамоталар мен бағалы сыйлықтар табысталды.
Экология – ұлт болашағына қызмет ететін құндылық
Іс-шараны ашқан Алматы мемлекеттік бизнес колледжінің директоры Айнұр Қуанышқызы қоршаған ортаға деген сүйіспеншіліктің тәрбиеден басталатынын атап өтті.
«Табиғатты аялау — бұл бір күндік акция емес, күнделікті өмір салтымызға айналуы тиіс. Жастарымызды тек білімді ғана емес, экологиялық сауатты, саналы тұлға ретінде тәрбиелеу – біздің басты мақсатымыз. Бүгінгі шара – соның нақты көрінісі», – деді ол.
Колледждің тәрбие ісі жөніндегі орынбасары Жұлдыз Құрманәлі де студенттердің белсенділігіне ризашылығын білдіріп:
«Экологиялық тәрбиені қызықты әрі есте қаларлық форматта өткізу – маңызды қадам. Квест форматы жастарға ұнайды, әрі олар нақты әрекет арқылы табиғатпен байланысын сезінеді», – деді.
Орманшылар үн қосты: табиғат – аманат
Іле Алатау ұлттық табиғи паркінің Медеу филиалының басшысы Бақтияр Нұрланұлы жастардың табиғатқа деген жанашырлығына оң баға берді:
«Біз тек табиғатты қорғап қана қоймай, оны болашаққа аман-есен жеткізуіміз керек. Бұл үшін жастардың белсенділігі аса маңызды. Осындай бастамалар арқылы табиғатты сүю — жаңа ұрпақтың дағдысына айналады деп сенеміз», – деді ол.
Филиал экологы, шараға қатысқан Арай Қалибекқызы да экологиялық білім берудің маңызын атап өтті:
«Жастарымыз тек тазалап қана қойған жоқ, қалдықты қалай қайта өңдеуге болатынын да ұсынды. Бұл — саналы қоғамның белгісі. Біз табиғатқа тұтынушы емес, серіктес ретінде қарауымыз керек», – деп пікір білдірді.
Президент Тоқаевтың үндеуімен үндес шара
Қазақстан Президенті Қасым-Жомарт Тоқаев өз Жолдауларында бірнеше мәрте қоршаған ортаны қорғау мәселесін баса айтқан болатын. Ол:
«Экологияны қорғау — барша азаматтың басты міндеті. Табиғатты сақтау — келер ұрпақ алдындағы борышымыз» — деп атап өткен.
«Таза Табиғат» экоквесті — осы үндеуге берілген нақты жауап. Іс-шара жастарды табиғатпен үндестікке, ортақ жауапкершілікке, ұжымдық жұмысқа баулып, экологиялық мәдениетті дамытудың сәтті үлгісіне айналды.
