Алматының «Абай» алаңында турникке тартылудан Tartyl Fest республиқалық фестивалі өтіп жатыр. Бұл шара ҚР Президентінің жанындағы «Дара» таланттарды қолдау қоры мен Алматы әкімдігі қолдауымен алғаш рет өткізіліп отыр.
Tartyl Fest фестивалін өткізудің басты мақсаты – Мемлекет басшысының тапсырмасы бойынша жастар мен жасөспірімдер арасында спортты дамыту, спортпен шұғылданатын тұрғындар санын арттыру, салауатты өмір салтын қалыптастыру.
«Абай» алаңында сағат 9:00-ден бастап қатысушылардың салмағы өлшеніп, оларға нөмірлер берілді. Фестивальге қатысушыларға бір ғана талап қойылады, яғни ережеге сай қатысушылар арасында турникке ең көп тартылу. Сайысшылар салмағы мен жасына байланысты 9 санатта жарысады. Жарыс ресми төрешілер алқасының қатысуымен өтеді.
Сайысқа 55 кг мен 80 кг аралығында 18 жасқа дейінгі жасөспірімдер қатысады. Сондай-ақ 80 кг мен 90 кг жоғары 30 жастан асқан ересектер де қатыса алады.
Фестиваль 10 шілде мен 6 қыркүйек аралығында еліміздің 20 қаласында өтеді. Әр қалада 27 жеңімпаз таңдалады.
Айта кетейік, бұл шара Алматы қаласында өте белсенді түрде өтуде. Өйткені қатысушылар саны жөнінен Алматы көш бастап тұр. Қалалықтар таңертең ерте келіп, салмақтарын өлшетіп, сайысқа қатысуға ниеті жоғары екенін байқатты. Фестивальге алматылықтар өте көп жиналған.
Еске салайық, бірінші орын жеңімпазына 200 мың теңге ақшалай сыйлық, екінші орын үшін – 100 мың теңге, үшінші орын үшін – 50 мың теңге беріледі.
Өңірлерден іріктелген жеңімпаздар астанада өтетін гранд-финалға қатысады, жүлде қоры – 54 млн теңге. Ал жарыс чемпионы Street Workout бойынша әлемдік чемпионатқа Қазақстаннан жолдама алады.