Алматы қаласының Медеу ауданына қарасты Алатау шағын ауданында жалпы ауданы 0,8 гектар болатын жаңа сквер салынды, деп хабарлайды aqshamnews.kz
Бұрын Ибрагимов көшесінде қараусыз қалған учаскеде енді жаңа қоғамдық кеңістік құрылды. Жоба аясында кешенді жұмыстар атқарылды: жаңа ойын және спорт алаңдары, скейт алаңы жасалды. Демалыс аймағында дұрыс демалу үшін беседкалар мен орындықтар орнатылды.
Жалпы ауданы 0,6 гектар аумақты көгалдандыруға ерекше назар аударылды: әртүрлі ағаштар мен гүлдер отырғызылды. Жасыл көріністі сақтау және өсімдіктерге күтім жасау үшін автоматты суару жүйесі қарастырылды.
Сквер аумағында қауіпсіздікті қамтамасыз ету мақсатында сумен жабдықтау желілері мен сыртқы жарықтандыру жүргізілді, сондай-ақ инфрақұрылым нысандарына қызмет көрсетуге арналған техникалық үй-жай қарастырылған.
Айта кетерлігі, Алатау шағын ауданы Алматы қаласынан 25 км қашықтықта орналасқан. Аудан 1957 жылы құрылған. Бұрын Алатау елді мекені Алматы облысының құрамына кіріп, кейін шамамен 30 жыл бұрын Алматының Медеу ауданына қосылып, «шағын аудан» мәртебесін алған.
Бүгінде тұрғын алабы өсіп, дамып келеді. Биыл тұрғындар үшін жалпы ауданы 7,3 мың шаршы метр, қуаты ауысымына 149 адамды қабылдай алатын денешынықтыру-сауықтыру кешені пайдалануға берілді.
Алматы әкімі Ерболат Досаевтың тапсырмасымен 2025 жылы сумен жабдықтау және су бұру желілерінің құрылысы басталады. Сонымен қатар, келесі жылы «Алатау» мемлекеттік ауруханасының ғимаратын қайта жаңарту жоспарланған. Сондай-ақ, Мәдениет үйін қайта құру бойынша 2 жылға арналған жоба іске қосылады. Жоба аясында жергілікті тұрғындар үшін комьюнити орталығын орналастыру қарастырылған.