Алматының Республика сарайында қала тұрғындары қырғыз әдебиетінің дара тұлғасы, классик жазушы Шыңғыс Айтматовтың 100 жылдығына арналған ерекше музыкалық қойылымды тамашалады, - деп хабарлайды aqshamnews.kz тілшісі.
Көрерменге ұсынылған бұл тарту - Қырғызстанның Тоқтағұл Сатылғанов атындағы Ұлттық филармониясының шығармашылық ұжымы дайындаған "Жәмилә" мюзиклі. Өткен көктемде Қырғызстан сахнасында тұсауы кесілген спектакль биыл алғаш рет алматылық ағайынмен жүздесті.
Кеш шымылдығы Мемлекеттік кеңесші Ерлан Қариннің құттықтау сөзімен ашылды. Ол өз сөзінде қазақ пен қырғыздың тамырлас, тағдырлас халық екеніне тоқталды.
"Бүгін Республика сарайында өтіп жатқан бұл ерекше кеш - екі елдің рухани байланысын нығайтатын маңызды оқиға. Президент атап өткендей, қазақ пен қырғыз - бауырлас жұрт. Біздің бірлігіміз тарихта із қалдырған ортақ тұлғалармен, мәдениет, дәстүр және өнермен бекемделген. Кеше Ош қаласында Абай музейінің ашылуы осының бір дәлелі болса, бүгін міне, Алматы сахнасында "Жәмилә" мюзиклі қойылып отыр", - деді Ерлан Қарин.
Қырғыз Республикасының мемлекеттік хатшысы Марат Иманқұлов та бұл премьераның екі халықтың достығы мен өзара құрметінің нышаны екенін атап өтті.
"Шыңғыс Айтматовтың есімі қырғыз ғана емес, қазақ мәдениеті үшін де айрықша қымбат. Оның шығармашылығын алғаш болып қолдап, бағасын берген - қазақ сөз өнерінің алыптарының бірі Мұхтар Әуезов. Сондықтан дәл осы мюзиклдің Алматыда сахналануының өзі терең мәнге ие", - деді ол.
"Жәмилә" - Жәмилә мен Даниярдың нәзік те нәубетті махаббат тарихын Сейіт есімді жігіттің көзімен баяндайтын шығарма. Жылдар бойы сан режиссерге шабыт берген бұл повесть сахнада жаңа тыныс алып, мюзикл жанрында қайта тірілгендей болды. Қойылымда адамдық қадір-қасиет, бір-біріне сүйеу болу, рухани беріктік пен төзім идеялары ерекше айшықталады. Бұл сезімдер көрерменге тек актерлер ойыны арқылы емес, музыка, ән мен би арқылы да жетті.
Даниярдың бейнесін - Құралбек Чокоев, Жәмиләні Сырға Сағынбекова сомдап шықты. Хореографиялық шешімдерге бас балетмейстер Ерлан Қамытбеков жетекшілік етті. Залға жиналған жұрт ұлттық нақыштағы түпнұсқа музыканың қырғыз фольклорымен ұштасуын, тарихи костюмдер мен сахналық көркемдеудің үйлесімін тамашалай отырып, кейіпкерлердің ішкі жан күйзелісі мен қуаныш-қайғысын терең сезіне алды.
Бұл премьера көрерменге рухани серпіліс пен эстетикалық ләззат сыйлап қана қойған жоқ, мәдениетаралық диалогты жандандырып, қазақ-қырғыз байланыстарын жаңа белеске көтерген маңызды оқиға ретінде есте қалды.
Шыңғыс Айтматовтың жүз жылдық мерейтойына арналған бұл мюзикл бүгінде халықаралық ауқымдағы мәдени бастамаға айналып келеді. Алматыдағы қойылымнан кейін "Жәмилә" Баку, Ташкент, Анкара және Еуропаның бірнеше қаласында сахналану жоспарланып отыр.