Шомылу маусымы жыл сайын 1 маусымнан басталады. Бұл туралы Өңірлік коммуникациялар қызметінің брифингінде Алматы қаласы Төтенше жағдайлар департаменті азаматтық қорғаныс басқармасының бастығы Әнуар Юсупов мәлімдеді, деп хабарлайды almaty-akshamy.kz
Алматы қаласы әкімдігімен суда жаппай демалуға арналған 4 орын анықталды:
- Сайран көлінің батыс және шығыс бөлігі;
- Д.Қонаев атындағы ҮАК бойындағы «Гүлдер» демалыс аймағы мен «Баум тоғайы» жағажайы.
«Алайда Сайран көлінде іргелес аумақты абаттандыру жүргізілуде, жұмыстарды аяқтау 2025 жылдың мамыр айында жоспарланған. Д. Қонаев атындағы Үлкен Алматы каналын гидротехникалық құрылыстармен күрделі жөндеуге байланысты ағымдағы жылы каналды сумен толтыру жоспары жоқ», - деді Әнуар Юсупов.
ӨКҚ спикері атап өткендей, жазғы демалыс кезеңінде қауіпсіздік мәдениетін арттыру мақсатында білім басқармасымен бірлесіп қала мектептері арасында «Қауіпсіз су» қауіпсіздік акциясы өткізілді (жоспар бекітілді), оған сәйкес барлық оқушылар арасында эссе, сурет, қабырға газеттері конкурстары, тақырыптық сызғыштар, сондай-ақ «Қауіпсіз су» тақырыбында сынып сағаттары өткізілді.
Судағы жазатайым оқиғалардың алдын алу мақсатында Департамент полиция қызметкерлерін, РЖҚЖ құтқарушыларын, сондай-ақ еріктілерді тарта отырып, рейдтік іс-шаралар өткізеді.
Қазіргі уақытта Департамент БАҚ арқылы үгіт-насихат жұмыстарын жүргізуде, барлық білім беру, денсаулық сақтау объектілерінде, адамдар көп жиналатын орындарда (СОО, СҮ, ХҚКО, вокзалдар, метрополитен, кинотеатрлар), сондай-ақ Алматы қаласының жолдары бойында орналасқан смартбордтар мен LED-экрандарда бейнероликтер көрсетілуде.
Сонымен қатар, шомылу маусымы аяқталғанға дейін күніне екі рет мемлекеттік және орыс тілдерінде «АспанФМ», «Еуропа Плюс Қазақстан» және «Народное радио» радиоарналарында «Судағы қауіпсіздік ережелері» тақырыбында аудиожазбалар таратылады, «Almaty tv» арнасында күн сайын «Судағы қауіпсіздік ережелері» тақырыбында бейнеролик көрсетіледі.