Алматыда қазақ кәсіпкерлерін біріктірген Сана бизнес форумы өтіп жатыр.
Тек қазақ тілінде ұйымдастырылған бұл форум бизнес және түрлі сала өкілдерін жинап, екінші рет өткізілуде.
Форум Алматыдағы «InterContinental» қонақ үйінде өтіп жатыр және оған әртүрлі салада табысқа жеткен 400-ге жуық қазақ кәсіпкерлері қатысуда. Олар «Даму», «Инновация» және «Серпіліс» атты үш негізгі тақырып төңірегінде қазіргі кәсіпкерлік мәселелерін талқылауда. Бұл талқылаулар кәсіпкерліктегі ең жаңа үрдістерден бастап, жүйелі бизнес құру тәжірибелерімен алмасуға бағытталған.
Әр сессияның спикерлері өз салаларындағы тың идеялар мен тәжірибелерін бөлісіп, жаһандық сын-қатерлер мен мүмкіндіктер жайлы пікір алмасады.
«Алматы ақшамы» газетіне берген сұхбатында жоба жетекшілерінің бірі Мақсат Халық, «Сана форумы арқылы қазақ кәсіпкерлерін біріктіріп, елге қызмет ететін ұлттық буржуазияны қалыптастыруды» мақсат тұтқандарын атап өткен еді.
Айта кетейік, форум бүгін кешке дейін жалғасады. Ауқымды шара аясында отандық кәсіпкерлердің көрмесі және түрлі ойын-сауық бағдарламалары да ұйымдастырылған.