Әлеуметтік желілерде жасөспірімдердің электросамокатпен әл-Фараби даңғылы бойымен жоғары жылдамдықта жүйткіп, өз өмірі мен өзгелердің қауіпсіздігіне қатер төндірген сәті түсірілген бейнежазба тарады.
Аталған дерекке байланысты жергілікті полиция қызметі тексеріс жүргізіп, оқиғаға қатысы бар екі азаматты анықтап, ұстады. Олардың бірі – кәмелет жасына толмаған жасөспірім. Тексеру барысында ересек азаматтың жүргізуші куәлігі жоқ екені белгілі болды. Ол жол қозғалысы ережесін өрескел бұзғаны үшін әкімшілік жауапкершілікке тартылды. Ал жасөспірімнің ата-анасына қатысты екі құқықбұзушылық – ата-аналық міндетін тиісті деңгейде орындамау және баланың түнгі уақытта ересектердің қарауынсыз жүруі бойынша шара қолданылды.
- Мұндай әрекеттерге жол берілмейді. Электросамокатпен қатты жылдамдықта жүру – тек өз өміріне ғана емес, өзгелерге де қауіп төндіреді. Біз мұндай заңбұзушылықтарға қатаң шара қабылдаймыз. Ата-аналардан балаларына мұқият болып, оларға көшеде қауіпсіз жүріс-тұрыс ережелерін түсіндіруді сұраймыз, – деді Алматы қаласы ПД жергілікті полиция қызметі басқармасы бастығының орынбасары Тимур Ноғайбаев.
Полиция жолдың – жоғары қауіп аймағы екенін ескертіп, әрбір азаматты қауіпсіздік ережелерін сақтауға шақырады.