Алматыдағы Сайран маңында жоғары вольтті желіде жарылыс болды: зардап шеккендер жоқ, деп хабарлайды Aqshamnews.kz тілшісі.
Қала әкімдігінің мәліметінше, 17 қарашада сағат 08:53-де Өтеген батыр көшесіндегі «Сұңқар» медорталығының автотұрағында жоғары вольтті электр желісі жарылған.
Оқиға орнына өрт сөндіру қызметі, полиция және жедел жәрдем 09:01-де жеткен.
«Зардап шеккендер жоқ. Изоляциялық материалдың сынықтары медорталықтың терезелерін және бір жеңіл автокөлікті зақымдалған. АЖК-ның авариялық қызметі жолда келе жатыр», – деп хабарлады әкімдік.
Жарылыс салдарынан Әуэзов ауданындағы 5, 8, 9, 10-шағынаудандар және Сайран аумағында жарық сөнген. 09:50-ге қарай 10-шағынауданнан басқа барлық аумаққа электр энергиясы қайта қосылған.
Айта кетейік, бүгін таңертең Сайран көлінің маңында жарылыс дауысы естілгені туралы тұрғындар әлеуметтік желілерде жазған еді. Сол сәтте көптеген үйлерде жарық өшкен.
Алматы қаласының ТЖД дерегінше, 08:53-де Өтеген батыр көшесінде трансформатордың жанғаны туралы хабарлама түскен.
Электр желісіндегі апаттың себептері анықталып жатыр.