Құрылтай депутаттарының сайлауы күні Алматыдағы сайлау учаскелерінің бірінде дауыс берушілерге Қазақстан Республикасының жаңа Конституциясының данасы сыйға тартылды, – деп хабарлайды aqshamnews.kz тілшісі.
Кітап сайлау учаскесіне дауыс беруге келген азаматтарға табысталды. Бұл сыйлық елдің жаңа Конституциясының күшіне енуіне орай ерекше мәнге ие болды.
Қазақстан Республикасының жаңа Конституциясы 2026 жылғы 1 шілдеде күшіне енді. Негізгі заңға сәйкес, елдегі заң шығару билігін жүзеге асыратын жоғары өкілді орган – бір палаталы Құрылтай.
Дәл бүгін, 23 тамызда Қазақстанда жаңа өкілді орган депутаттарының алғашқы сайлауы өтіп жатыр. Дауыс беру қорытындысы бойынша 145 депутат бес жыл мерзімге сайланады.
Осылайша, Конституцияны сыйға алған сайлаушылар үшін бұл тарту жаңа Конституцияның қабылданып, күшіне енуімен басталған елдің саяси жүйесіндегі жаңа кезеңнің өзіндік белгісіне айналды.