Алматы әкімдігі Рысқұлов көшесін ұзарту жобасына байланысты Алатау ауданындағы бірнеше жер учаскесін мемлекет мұқтажы үшін мәжбүрлеп иеліктен шығару туралы қаулы қабылдады, деп хабарлайды Aqshamnews.kz тілшісі.
Қаулыға сәйкес, жол құрылысы үшін Алатау ауданындағы «Теректі» және «Алғабас» шағын аудандарында орналасқан 2 жер учаскесі мемлекет қажетіне алынады. Жоба Рысқұлов көшесін Оңғарсынова көшесінен Алматы қаласының шекарасына дейін ұзартуды көздейді.
Мәжбүрлеп иеліктен шығару рәсімі 2027 жылдың 31 желтоқсанына дейін жалғасады. Меншік иелері Алматы қаласы, Төле би көшесі, 155 мекенжайындағы 603-кабинетке жүгіне алады.
Құжатта көрсетілгендей, өтемақы төлеуді Алматы қаласының Жер қатынастары басқармасы қамтамасыз етеді. Ал жер телімдері кейін «Алматы қаласы Жол инфрақұрылымын дамыту басқармасы» теңгеріміне беріледі.
Иеліктен шығарылатын нысандар қатарында «Теректі» шағын ауданындағы Орталық көшесі, 78-мекенжайындағы бірнеше пәтер мен «Алғабас» шағын ауданындағы Ф.Оңғарсынова көшесі, 75 мекенжайында орналасқан жер учаскесі бар.
Қаулы 2026 жылғы 6 мамырда қабылданған.