Алматыда 26 шілде күні өткен қалалық Recycle Бірге экологиялық акциясы барысында құрамында сынабы бар 430 шам жиналды, – деп хабарлайды aqshamnews.kz тілшісі.
Қауіпті тұрмыстық қалдықтар кейіннен кәдеге жарату үшін «Eco Almaty» ЖШС-не тапсырылды.
Құрамында сынап болғандықтан мұндай шамдарды кәдімгі қоқыс жәшіктеріне тастауға болмайды. Себебі шынысы сынған жағдайда улы зат ауаға, топыраққа және суға таралуы мүмкін.
«Бізге тапсырылған шамдар қауіпсіздік талаптарына сай сақталып, кейін арнайы мамандандырылған ұйымға жіберіледі. Мұндай қалдықтарды сынаптың қоршаған ортаға таралуына жол бермеу үшін міндетті түрде бөлек жинау қажет», – деді Eco Almaty өкілдері.
Акцияға қатысушылар пластик, макулатура, шыны, металл қаптамалар, пайдаланылған батареялар, ескі электроника, кабельдер және басқа да қалдық түрлерін әкелді. Сұрыпталғаннан кейін қайта өңдеуге жарамды материалдар тиісті ұйымдарға жіберіледі.
Акция тұрғындарды, еріктілерді, экологиялық белсенділерді, бизнес өкілдерін және қоғамдық ұйымдарды біріктірді. Іс-шара алаңында заттарды қайта пайдалану және айырбастау аймақтары да жұмыс істеді. Тұрғындар киім-кешек, аяқ киім, ойыншықтар, кітаптар, ыдыс-аяқ және басқа да жарамды заттарды жаңа иелеріне тапсырды.
Қатысушылар кітаптармен, бөлме өсімдіктерімен, қалемшелермен және тұқымдармен алмасып, қалдықтарды бөлек жинау мен жауапты тұтыну тақырыбындағы шебердің сабақтары мен дәрістерге қатысты.
Recycle Бірге жобасы Greenup.kz қоғамдық қоры тарапынан 2019 жылдан бері жүзеге асырылып келеді. Жоба Алматыда қалдықтарды сұрыптау, қайта өңдеу және заттарды қайта пайдалану мәдениетін дамытуға ықпал етеді.