Алматыдағы орталық музейде Орталық Азия қолөнер шеберлерінің «Қызғалдақтар гүлдегенде» деп аталатын көрме-жәрмеңкесі ашылды.
Іс-шараға еліміздің және Қырғызстан, Өзбекстан, Түркіменстаннан келген шеберлер мен суретшілер және дизайнерлер қатысып жатыр, деп хабарлайды Almaty-akshamy.kz 24.kz-ке сілтеме жасап.
Жәрмеңкеге этностильдегі жаңа киім үлгілері мен зергерлік бұйымдар, керамика, металл, киіз бен жібектен жасалған, әртүрлі заттар және суретшілердің картиналары қойылған. Мақсат - көршілес елдер арасындағы мәдени байланысты нығайту. Жәрмеңкеге қыш өнерінің һас шебері Марат Сәрсебаев та келіпті. Оның жұбайы қазақтың ұлттық киімдерін киген қуыршақтарын жасаса, отағасы Сығанақ пен Отырардан, Тараздан табылған көне дүниелердің көшірмесін әкеліпті.
«Ерте заманнан бастап өзіміздің де осындай үлкен мәдениет болғанын, мәдени дүниелердің көп болғанын халыққа көрсету, халыққа таныстыру керек. Міне, мысалға мына дүниелер - мынау енді Отырардан шыққан дүниелер. Енді соның технологияларын жасап көрсетуге сондай бір тырысу болды менде. Бір жағынан, өзіңнің де ойлаған дүниелерің бар. Сондай-сондай заттарды ақырындап, ақырындап халыққа көрсету - мақсатымыз. Міне, таза глазур, таза дүние», - дейді қыш шебері Марат Сәрсебаев.