Алматыда құрылыс сапасын арттыру және тұрғындардың құқықтарын қорғау бойынша жұмыс күшейіп жатыр.
Бұл туралы қала әкімінің орынбасары Бейбіт Шаханов Өңірлік коммуникациялар қызметінде өткен брифингте айтты, - деп хабарлайды Aqshamnews.kz.
Оның айтуынша, әкімдіктің басты міндеті – құрылыс саласында тәртіп орнату және заң бұзушылықтарға жол бермеу. Әсіресе үлестік қатысу арқылы тұрғын үй салу бағыты ерекше бақылауда.
«Біз құрылыс компанияларының жұмысын тұрақты түрде тексереміз. Құрылыстың сапасы, мерзімі және келісімшарт талаптарының орындалуы қатаң бақыланады. Егер заң бұзылса, ескерту жасаймыз, айыппұл саламыз немесе қажет болса, жұмысты тоқтатамыз», – деді қала әкімінің орынбасары.
Жоба басталар алдында барлық рұқсат құжаттары мен қаржылық кепілдіктер тексеріледі. Бұл болашақ үлескерлердің қауіпсіздігін қамтамасыз етеді.
Қала әкімдігі тұрғындарға сенімді құрылыс компанияларын таңдауға көмектесу үшін ашық ақпараттық тізім жүргізеді және оны үнемі жаңартып отырады.
Мемлекеттік тапсырыспен жұмыс істейтін құрылысшылардың да жауапкершілігі күшейтілді.
«Кейбір мердігерлер өз міндеттерін дұрыс орындамайды. Соның кесірінен мектептер мен балабақшалардың құрылысы кешігеді. Біз мұндай жағдайларға жол бермейміз», – деді спикер.
Биыл екі компания – «СК 7 Строй» ЖШС және «AsiaMax» ЖШС лицензиясынан айырылды. «СК MEGARON» ЖШС бойынша тексеру жүргізіліп жатыр. Сондай-ақ «Құрылысшы-ТБС» ЖШС лицензиясының бір бөлігі тоқтатылып, «Алатау сапа құрылыс» ЖШС техникалық қадағалау құқығынан айырылды.
Бейбіт Шаханов атап өткендей, мақсат – құрылыс саласында әділдік орнатып, қала тұрғындарының мүддесін қорғау.