Алматыда бір түнде қорқор шеккен 100-ден астам азаматқа айыппұл салынды, – деп хабарлайды aqshamnews.kz.
Алматы полициясы қорқорларға қатысты жасалған ауқымды рейдтің қалай өткенін айтып берді. Бір түнде 100-ден астам кальян шегушіге айыппұл салынды.
– Темекі өнімдерін пайдаланудағы заң бұзушылықтарды анықтау мақсатында ойын-сауық мекемелерінде жергілікті рейдтер жүргізілді. Барлығы 12 бар, клуб және дәмхана тексерілді. Кальян шеккені үшін 102 адам әкімшілік жауапкершілікке тартылды. Мекемелерден барлығы 96 кальян құрылғысы тәркіленді, – деді Алматы қалалық ПД жергілікті полиция қызметі басқармасы бастығының орынбасары Айтан Елеусізов.
Еске салайық, қоғамдық орындарда кальян шегуге тыйым салуды енгізу туралы қаулы 2013 жылдың 14 наурызында күшіне енген болатын. Бірақ жастар, қоғамдық тамақтандыру орындарында, түнгі клубтар мен барларда хош иісті түтінмен тыныстауды жалғастыруда. ҚР ӘҚБтК-нің 441-бабында көзделген бұзушылықтар анықталса, кальян шегетін адамдарға 15 АЕК көлемінде айыппұл салынады. Қайталап бұзған жағдайда – 20 АЕК. Ал мекеме иелеріне 20-дан 60 АЕК-ке дейін айыппұл салынады.