«Almaty Business – 2025» өңірлік кәсіпкерлікті қолдау бағдарламасы аясында «Алматы» ӘКК» АҚ еншілес ұйымы «Almaty Finance» ЖШС «KELET Machine-Building Plant» ЖШС-не елімізде тұңғыш рет құбырлы электр жылытқыштар өндірісін іске қосу үшін 500 млн теңге көлемінде қаржы бөлді. Қарыздың сыйақы мөлшерлемесі жылына 6% (ЖТСМ), несиелеу мерзімі - 5 жыл.
Компания өз қаржысы есебінен Жетісу ауданындағы өндірістік корпусты күрделі жөндеуден өткізіп, бизнес-жоспар әзірледі. Қарызға алынған қаражат өнімдердің бетін дайындап, ұнтақты бояу және кептіру жұмыстарына арналған итальяндық қондырғыны және бояу желісін сатып алуға жұмсалады.
Өндірісті жаңғырту «КЕЛЕТ» АҚ-ның еншілес кәсіпорнына Қазақстандағы ірі машина жасау зауыттарының біріне жылына 1 млн данаға дейін құбырлы электр жылытқыштарды жаппай шығаруға мүмкіндік береді. Жоба отандық өндіріс көлемін арттырып, импортқа тәуелділікті азайтып, энергия үнемдейтін жабдық түрлерін көбейтуге және экспорттық әлеуетті нығайтуға жол ашады.
Жаңа өндірістік желіні іске қосумен қатар, қолданыстағы бояу желісі де жаңғыртылады. Бұл жаңарту түстерді ауыстыру уақытын қысқартып, бояу шығынын азайтып, су жылытқыштар, калориферлер, электр конвекторлары мен газ қазандықтарын шығару қарқынын арттыруға септігін тигізеді.
«Жобаны іске асыру арқылы энергия үнемдейтін жабдықтар сегментіндегі отандық өнімнің үлесі артып, 20 тұрақты жұмыс орны ашылады және алдағы 5 жылда бюджетке 800 млн теңгеден астам салық түсімін қамтамасыз етеді», — деді «Almaty Finance» ЖШС Басқарма төрағасы Берік Құсайынов.
Өндіріс келесі жылдың наурыз айында іске қосылады деп жоспарланып отыр.