Қазақстанның Төтенше жағдайлар министрі, генерал-майор Шыңғыс Әрінов Алматыға жұмыс сапары барысында «Қазселденқорғау» мемлекеттік мекемесінің Алматы филиалында болды, деп хабарлайды aqshamnews.kz
Министр мекеменің қызметімен танысып, бірқатар нысандарды, соның ішінде орталық диспетчерлік пунктті, автомобильдер мен арнайы техникалардың жағдайын тексерді. Сапар аясында Шыңғыс Әрінов «Қазселденқорғау» қызметкерлерімен бірге көшкін жағдайына мониторинг жүргізіп, аэровизуалды барлау ұйымдастырды. Бұл шара барысында қар көшкіндерінің алдын алу үшін орнатылған жаңа жабдыққа ерекше назар аударылды.
Министрге «DaisyBell» мобильді қар көшкініне қарсы жүйесі таныстырылып, сынақтан өтті. Бұл қондырғы тікұшаққа кабель арқылы бекітілген металл конус болып табылады. Оның жұмыс принципі – конустағы азот-сутегі қоспасын қашықтан жару арқылы қар көшкінінің тиімді түсуін қамтамасыз ету. Аталған жүйе Еуропа елдерінде, соның ішінде Ресейде кеңінен қолданылып келеді және жергілікті климаттық жағдайларда оның тиімділігін бағалау үшін Қазақстанда сынақтан өтуде.
«Қазавиақұтқару» АҚ тікұшағы арқылы жүргізілген барлау кезінде «DaisyBell» жүйесі Үлкен және Кіші Алматы өзендерінің көшкін қаупі бар аймақтарында қар көшкіндерін алдын алу шараларында қолданылды. Шыңғыс Әрінов жаңа технологияларды қар көшкінінің алдын алу жұмыстарында белсенді қолдану қажеттігін атап өтіп, тиісті тапсырмалар берді.
Қазақстанда қар көшкіні – адамдардың өміріне қауіп төндіретін ең қауіпті табиғи құбылыстардың бірі. Елімізде көшкін қаупі бар 619 учаске бар, оның 165-і Алматы қаласында орналасқан. Жыл сайын «Қазселденқорғау» шамамен 150 профилактикалық қар көшкінін түсіруді жүзеге асырады. 2024-2025 жылдардағы қысқы маусымда 15 профилактикалық түсіру жүргізіліп, жалпы көлемі 6665 м³ қар шығарылған.
«Қазгидромет» РМК мәліметі бойынша, 2025 жылдың қаңтар және ақпан айларында таулы аймақтарда жоғары температура мен мол жауын-шашын болуы мүмкін, бұл қар көшкіндерінің қаупін арттырады. Осы жағдайды ескере отырып, көшкіндердің алдын алу жұмыстары жалғасуда.