Алматы қаласының полиция департаменті қаңтар оқиғаларына байланысты қылмыстық құқық бұзушылық фактілерін ашуды және тергеу жұмыстарын одан әрі жалғастыруда. Бұл туралы Алматы полиция департаменті бастығының орынбасары Рустам Абдрахманов әлеуметтік желіде жазды, деп хабарлайды Almaty-akshamy.kz ҚазАқпаратқа сілтеме жасап.
Оның айтуынша, бүгінгі таңда сотқа дейінгі тергеудің бірыңғай тізіліміне полиция департаменті мен оның аумақтық бөлімшелері 1481 қылмыстық істі тіркеді.
Олардың ішінде бөтеннің мүлкін ұрлау бойынша 1 213, бөтеннің мүлкін қасақана жою бойынша 46, қару мен оқ-дәрілерді заңсыз сақтау фактілері бойынша 41 іс бар.
Жоғарыда аталған қылмыстарды жасады деген күдікпен 236 адам ұсталды. Оның ішінде 214-іне қатысты сот «күзетпен ұстау» бұлтартпау шарасына санкция шығарды. Үш күдіктіге қатысты «ешқайда кетпеу және тәртіптілік таныту қолхаты» түрінде бұлтартпау шарасы таңдалды.
«Жүргізілген жедел іздестіру іс-шаралары нәтижесінде заңсыз айналымнан 144 атыс қаруы мен 8 мыңнан астам оқ-дәрі тәркіленді. Наразылық акциялары кезінде қылмыстық элементтермен Алматы қаласының аумағында орналасқан 1 602 объектіге шабуылдар жасалып, дүние-мүліктер талқандалды. Қазіргі уақытта ПД тергеу бөлімшелері бүлінген объектілердің жалпы санының 97%-ын тексеріп шықты. Бұл бағыттағы жұмыс аяқталу сатысында», - деді Рустам Абдрахманов.