Алматы қаласында полиция қызметкерлері студенттер арасында құқықтық білім беру жұмыстарын белсенді түрде жүргізіп жатыр. Бұл шараның басты мақсаты – жастардың құқықтық сауаттылығын арттырып, студенттер арасында құқық бұзушылықтың алдын алу, – деп хабарлайды aqshamnews.kz. .
Қазіргі таңда Алматыда 180 мыңнан астам студент білім алуда, олар 36 жоғары оқу орны мен колледждерде оқиды. Студенттік орта кез келген қоғамның ең белсенді, жаңашыл және ұйымдасқан бөлігін құрайды. Сондықтан тәртіп сақшылары жастарды заң талаптарын қатаң сақтауға, күмәнді ортадан аулақ болуға және құқық бұзушылықтың салдары туралы ақпараттандыруға ерекше назар аударуда.
Бостандық аудандық полиция басқармасына қарасты полиция бөлімінің бастығы Мұхамедәлі Сейсенұлы атап өткендей, полицияның міндеті – студенттерге заңды сақтау қажеттілігін түсіндіру, оларды заңсыз әрекеттерден аулақ болуға шақыру және оларды құқықтарын қорғау үшін сенім телефондары арқылы көмек сұрауға ынталандыру. Сонымен қатар, жастар арасында есірткіге қарсы теріс көзқарас қалыптастыру да басты мақсаттардың бірі болып табылады.
Жастарды өз уақытын білім алуға, шығармашылық және спорттық белсенділіктерін дамытуға арнауға шақыру да маңызды. Бұл бастама студенттердің құқықтық сауаттылығын арттырып қана қоймай, олардың қауіпсіз ортада өмір сүруіне ықпал етуге бағытталған.