"Құқықтық тәртіп" республикалық жедел алдын алу іс-шарасы аясында Алматы қаласының Түрксіб аудандық ПБ әкімшілік полиция бөлімшесінің қызметкерлері қаладағы екі автобус паркінің жұмысын тексерді, - деп хабарлайды Aqshamnews.kz.
Мақсат – жолаушылар тасымалының қауіпсіздігін арттыру және қоғамдық көлік құралдарының техникалық жай-күйін қатаң бақылау. Іс-шараның міндеттері – қоғамдық көліктерді желіге шығаруға дейін автопарктердің дайындығын, рейс алдындағы тексерулердің, оның ішінде медициналық бақылаудың талаптарға сай болуын қадағалау, сондай-ақ жолаушыларды тасымалдау қызметінің сапасын бақылау.
Полиция қызметкерлері автобустардың техникалық жағдайын, қажетті құжаттардың болуын, жүргізушілердің рейс алдындағы медициналық тексеруден өту тәртібін және көліктің қауіпсіз жұмысқа дайындығын тексерді.
Тексеру нәтижесінде заң бұзушылықтар анықталды. Автопарк лауазымды тұлғасына қатысты техникалық ақауы бар көлікті желіге шығарғаны үшін жауапқа тартылады. Бір қоғамдық көлік арнайы айыппұл тұрағына қойылды.
- Профилактика жылы аясында жолаушылар тасымалы сапасына бақылау күшейтілді. Біздің мақсатымыз – тек заңбұзушылықты анықтау емес, сонымен қатар азаматтар үшін болуы мүмкін қауіп-қатердің алдын алу. "Құқықтық тәртіп" іс-шарасы аясындағы жұмыстар тасымалдаушылардың тәртібін арттырып, қала жолдарындағы қауіпсіздік деңгейін жоғарылатуға мүмкіндік береді, – деді Түрксіб аудандық полиция басқармасының бастығы Думан Аухадиев.