Алматы қаласында пластик қақпақтарды жинап, оларды кейін қайта өңдеуге өткізуге бағытталған «Добрая крышечка» экологиялық науқанның басталғаны ресми түрде жарияланды.
Бұл туралы Алматы қаласының Экология және коршаған орта басқармасының өкілдері мәлімдеді, - деп хабарлайды Aqshamnews.kz.
Науқан «Таза Қазақстан» жалпыұлттық бағдарламасы аясында қала әкімдігінің жобалық кеңсесінің қолдауымен өтеді және қоршаған ортаны қорғау, пластик қалдықтарының көлемін азайту, сондай-ақ тұрғындар арасында қалдықтарды бөлек жинау мәдениетін қалыптастыру мәселелеріне назар аударуға бағытталған.
Бастамаға мектеп оқушылары, балабакша тәрбиеленушілері, ата-аналар, сондай-ақ қала тұрғындары белсенді түрде қатыса алады. Ұйымдастырушылардың айтуынша, тұрғындарды экологиялық тәжірибелерге тарту коршаған ортаға жауапты көзкарас қалыптастыруға және экологиялық ахуалды жақсартуға септігін тигізеді.
Жиналған пластик қақпақтарды Алматының барлық аудандарының тұрғындары жақын маңдағы қалдықтарды қабылдайтын комьюнити орталықтарға тапсыра алады.
Қабылдау пункттерінің мекенжайлары:
• Алатау ауданы - Саялы шағын ауданы, 71;
• Әуезов ауданы - Мамыр-1 шағын ауданы, 26/1;
• Жетісу ауданы - Серіков көшесі, 6а;
• Наурызбай ауданы - Шұғыла шағын ауданы, Сакен Жүнісов көшесі, 4/3;
• Бостандық ауданы - Абай даңғылы, 164/6;
• Түрксіб ауданы - Жас-Қанат шағын ауданы, 49А;
• Алмалы ауданы - Байтұрсынов көшесі, 22/1;
• Медеу ауданы - Халилуллин көшесі, 140/5.
Науқан аясында экологиялық жәрмеңкелер, қалдықтарды қайта өңдеуге арналған оқыту шеберлік сыныптары, сондай-ақ балалар мен ересектерге арналған интерактивті іс-шаралар өткізу жоспарланған.
#TazaQazaqstan #ТазаҚазақстан, #экология, #TazaChallenge