Алматы қаласы полиция департаментінде Кеңес әскерлерінің Ауғанстан жерінен шығарылғанына арналған еске алу іс-шарасы өтті, – деп хабарлайды Aqshamnews.kz Polisia.kz-ке сілтеме жасап,
Жиынға департамент басшылығы, жеке құрам, ішкі істер органдарының ардагерлері, сондай-ақ қызметтік міндетін атқару кезінде қаза тапқан қызметкерлердің отбасы мүшелері қатысты. Жиналғандар қаза болғандарды бір минут үнсіздікпен еске алып, мемориалға гүл шоқтарын қойды. Іс-шараның маңызды бөлігі ретінде қатысушылар жаңа ведомстволық "Ғасырлар мұрасы" музейін аралады. Музей экспозицияларында ішкі істер органдары тарихының тағылымды беттері, архивтік құжаттар мен ел тыныштығы жолында жанын қиған қызметкерлердің өмір жолы көрініс тапқан. Іс-шара барысында Алматы қаласы полиция департаментінің бастығы Айдын Кабдулдинов сөз сөйлеп, тарихи жадыны сақтау мен ұрпақтар сабақтастығының маңызын атап өтті.
– Әскери және қызметтік борышын абыроймен орындаған әріптестерімізді еске алу – өткенге тағзым ғана емес. Бұл – бүгінгі полиция қызметкерлері үшін адамгершілік бағдар. Олардың ерлігі, қайсарлығы және антқа адалдығы – нағыз патриотизм мен қоғам алдындағы жауапкершіліктің үлгісі, – деді Айдын Кабдулдинов.
Сондай-ақ департамент басшысы қаза тапқан қызметкерлердің отбасыларына алғыс білдіріп, оларға қамқорлық жасау ведомство үшін әрдайым басым бағыт болып қала беретінін жеткізді.
– Біз соғыстан оралмаған және бейбіт күнде құқықтық тәртіпті қорғау жолында қаза болған азаматтардың есімін ұмытпауға міндеттіміз. Бұл – біздің кәсіби әрі адами борышымыздың негізі, – деп атап өтті Алматы қаласы полициясының басшысы.
Мұндай тағылымды шаралар ұжымдық рухты нығайтып, қызмет тарихына деген құрметті арттырады және жас буын қызметкерлерді заңға, Отанға адал қызмет ету рухында тәрбиелеуге ықпал етеді.