Алматы қаласында пәтер тонаумен айналысқан қылмыстық топ құрықталды. Бұл туралы Polisia.kz сайтына сілтеме жасап, Aqshamnews.kz хабарлайды.
Алматы криминалдық полициясы арнайы жасақтың көмегімен Байзақов пен Бұқар жырау көшелерінің қиылысында 38 бен 45 жас аралығындағы төрт ер адамды ұстады. Олар – Алматы және Жамбыл облыстарынан келген.
Күдіктілер өткен демалыс күндері Шашкин көшесіндегі үйлердің біріне терезені күштеп ашып, темір торларды кесу арқылы кірген. Олар пәтерден алтын бұйымдар мен ақшалай қаражатты ұрлаған. Ұстау барысында айғақты заттар тәркіленіп, қылмыстық іске қосылды.
Алматы қалалық ПД криминалдық полиция басқармасының бастығы Талант Исаевтың мәлімдеуінше, күдіктілер қамауға алынып, олардың басқа ұқсас қылмыстарға қатысы бар-жоғы тексерілуде. Қылмыстық іс Бостандық аудандық полиция басқармасы тарапынан тергелуде.
ҚР Қылмыстық кодексінің 201-бабына сәйкес, тергеу мүддесіне байланысты қосымша мәліметтер жарияланбайды. Сонымен қатар, Қазақстан Республикасының Конституциясына сәйкес, соттың заңды шешімі шыққанға дейін күдіктілер кінәсіз деп саналады.