Алматыда ҚР Қарулы Күштері Бас әскери-медициналық басқармасының ұйымдастыруымен әскери дәрігерлер мен медициналық қызметкерлердің қатысуымен маңызды іс-шара өтті. Жиынға Алматы өңірлік гарнизонының әскери бөлімдері, Қарулы күштердің түрлері мен әскер тектері медициналық қызметтерінің басшылары қатысты, деп хабарлайды aqshamnews.kz
Іс-шара Қорғаныс министрлігі әскери клиникалық госпиталінің базасында ұйымдастырылды. Тәжірибелік сабақтар 61993 әскери бөлімі мен Құрлық әскерлері әскери институтының нысандарында өткізілді. Бұл іс-шара әскери медициналық қызметтің сапасын арттыру, жаңа әдіс-тәсілдерді үйрету және әскери салада денсаулық сақтау жүйесін жетілдіру мақсатында маңызды рөл атқарды.
Жиын барысында дәрі-дәрмектер мен медициналық жабдықтауларды жоспарлау және сатып алу мәселелері талқыланды. Сондай-ақ, емдеу-алдын алу шараларын ұйымдастыру және медициналық жабдықтың тиімді пайдалану жай-күйі туралы лауазымды тұлғалар баяндама жасады. Әскери дәрігерлер амбулаториялық және стационарлық пациенттермен жұмыс істеу, жарақат алған науқастардың есепке алу құжаттамасын жүргізу мәселелерін пысықтады. Сонымен қатар, әскери қызметшілердің, оның ішінде тәуліктік нарядқа түсушілердің профилактикалық медициналық тексеруден өткізу стандарттары да қарастырылды.
Тәжірибелік сабақтарда дәрілік заттарды сақтау, есепке алу және есептен шығару тәртіптері де егжей-тегжейлі талқыланды. Жиынға қатысушылар дене шынықтыру дайындығынан сынақ тапсырып, арнайы дайындық бойынша нормативтерді орындады. Бұл іс-шара әскери медициналық қызметтің сапасын жақсартуға, әскери қызметшілердің денсаулығын қорғауға және жалпы әскердің жауынгерлік дайындығын нығайтуға маңызды үлес қосты.