№114 жалпы білім беретін мектептің 8–11 сынып оқушыларына террористік сипаттағы құқықбұзушылықтардың алдын алу және терроризм актісі туралы көрінеу жалған хабарламалардың жолын кесу мақсатында арнайы ақпараттық-насихаттық бейнеролик көрсетілді.
Аталған бейнеролик Алматы қаласы бойынша Ұлттық қауіпсіздік комитеті Департаментінің бастамасымен, терроризмге қарсы күрес жөніндегі қалалық жедел штаб шеңберінде дайындалған.
Бейнероликтің мазмұны бірнеше маңызды бағыттарды қамтыды. Атап айтқанда, террористік сипаттағы қылмыстар жасағаны үшін көзделген жауапкершілік, оның ішінде жарылғыш құрылғылар қойылғаны туралы анонимді қоңыраулар мен жалған хабарламалар таратудың заң алдындағы салдары кеңінен түсіндірілді. Сонымен қатар террористік қауіп-қатер туралы хабарлама немесе қоңырау келіп түскен жағдайда алғашқы іс-қимылдар тәртібі нақты көрсетілді.
Іс-шара барысында оқушыларға Қазақстан Республикасы заңнамасына сәйкес терроризм актісі туралы көрінеу жалған хабарламалардың құқықтық салдары туралы толық ақпарат берілді. Әсіресе Қазақстан Республикасы Қылмыстық кодексінің 273-бабына сәйкес мұндай жалған хабарлама жасағаны үшін бас бостандығынан айыруға дейінгі қылмыстық жауапкершілік көзделетіні түсіндірілді.
Мамандардың айтуынша, мұндай алдын алу шаралары оқушылардың құқықтық сауаттылығын арттыруға, қауіпсіздік мәдениетін қалыптастыруға және қоғамдағы жауапкершілікті күшейтуге ықпал етеді.