ҚР Мемлекеттік қызмет істері агенттігінің Алматы қаласы бойынша департаменті мен Алматы қаласы әкімдігі бірлесіп өткізген өңірлік кадр комиссиясының отырысы қала әкімі Ерболат Досаевтың төрағалығымен өтті. Комиссия барысында Өңірлік кадр резервіне кандидаттарды іріктеу жүргізілді, деп хабарлайды aqshamnews.kz
Қала әкімі Ерболат Досаев іріктеудің алғашқы үш кезеңінен өткен үміткерлерді құттықтап, оларға сәттілік тіледі. Барлығы 43 үміткер заңнаманы білуге, жеке қасиеттері мен құзыреттерін бағалауға арналған тестілеуден өтті.
«Еліміздің Президенті Қасым-Жомарт Тоқаев талантты және мақсатты жастар үшін әлеуметтік лифттердің маңыздылығын бірнеше рет атап өтті. Өңірлік кадр резерві біздің үміткерлер үшін дәл осындай лифт болатынына сенімдімін», - деді Алматы әкімі.
Іріктеу барысында үміткерлер өздерінің презентациялық жобаларын ұсынып, олардың идеяларының мәні мен мақсаттарын, іске асыру кезеңдерін, ықтимал проблемалар мен күтілетін нәтижелерді және оларды шешу жолдарын баяндады.
Іріктеу нәтижесінде 30 резервші Өңірлік кадр резервіне қабылданатын болады. Олар екі жыл ішінде конкурссыз қаланың жергілікті атқарушы органдарындағы түрлі бос лауазымдарға үміткер бола алады.
ҚР Мемлекеттік қызмет істері агенттігінің Алматы қаласы бойынша департамент басшысы Шынарай Әлімхан өңірлік комиссия төрағасының орынбасары болып табылады. Комиссия құрамына сондай-ақ қалалық мәслихат төрағасы Мейіржан Отыншиев, Алматы қаласы бойынша Тексеру комиссиясының төрағасы Алтай Бердіқұлов және қала әкімі аппаратының басшысы Айдар Жақыбаев кірді.
Комиссия қызметінің ашықтығын қамтамасыз ету мақсатында іріктеудің соңғы кезеңінде Мемлекеттік қызмет істері департаменті тәуелсіз салалық сарапшыларды тартты.
«Іріктеу кезеңдері өте күрделі болды. Әр кандидаттың құзыреті тексерілді. Біз 3 күн ішінде комиссия отырысын өткізіп, 30 лайықты кандидатты іріктеп алуымыз керек. Өңірлік кадр резервінің ерекшелігі - әрбір кандидат өз ерекшелігі бойынша өздеріне жақын салалық бағыттар бойынша өтініш берген», - деп атап өтті Мемлекеттік қызмет істері департаментінің басшысы Шынарай Әлімхан.
Тәуелсіз сарапшылар барлық кандидаттар үшін ашықтық пен әділ іріктеудің қамтамасыз етілгенін атап өтті.
«Барлық азаматтар конкурсқа қатысуға құқылы болды, және біз сарапшылар ретінде қатысқан соңғы кезеңде біз мемлекеттік қызметшілерден басқа бизнес өкілдері, мұғалімдер, дәрігерлер, академиялық сала мен квазимемлекеттік сектор өкілдерінің де болғанын көрдік. Барлығына бірдей қолжетімділік қамтамасыз етілді. Ашықтық пен әділдік қамтамасыз етілді», - деді «Алматы Азаматтық альянсы» ЗТБ-нің төрағасы Қайыржан Әбдіхалықов.
Анықтама: Өңірлік кадр резервіне іріктеудің бірінші кезеңі 1 наурызда басталды. Іріктеуге жоғары білімі және жалпы жұмыс өтілі кемінде 3 жыл, 35 жастан аспаған Қазақстан азаматтары қатыса алады. Алматы қаласы бойынша бірінші кезеңде 261 үміткер құжаттарын тапсырды.