Алматы қаласында полиция қызметкерлері стоматологиялық емханалардың бірінен заңсыз электронды темекі айналымын анықтап, 13 мыңға жуық вейп тәркіледі, деп хабарлайды aqshamnews.kz Polisia.kz. cілтеме жасап.
Жедел іздестіру шаралары барысында емхананың қоймасынан заңсыз электронды темекілер табылды. Тергеу нәтижесінде 32 жастағы ер адам ұсталып, оның заңсыз айналыммен айналысқаны белгілі болды. Бұрын заңсыз ойын бизнесін ұйымдастырғаны үшін сотталған ол бұл жолы да заңсыз әрекеттерге барып, досының емханасын вейптерді уақытша сақтау қоймасына айналдырғанын мойындады.
Алматы қалалық ПД экстремизмге қарсы күрес басқармасының бастығы Асхат Дәулетияровтың айтуынша, ұсталған азамат заңсыз баю мақсатында тыйым салынған вейп құралдарын жасырын сатумен айналысқан. Қазіргі таңда қылмыстық істі Медеу аудандық полиция басқармасы тергеп жатыр.
Естеріңізге сала кетейік, 2024 жылдың 20 маусымында Қазақстанда вейптерді сатуға тыйым салатын заң күшіне енді. Қазақстан Республикасының Қылмыстық кодексіне 301-1-бап (Шылым шекпейтін темекі өнімдерінің, электронды тұтыну жүйелерінің (вейптар), хош иістендіргіштер мен оларға арналған сұйықтықтардың айналымы) қосылды.