Алатау ауданында жаңа “NurOrda” мектебі ашылды, деп хабарлайды aqshamnews.kz.
Білім ордасының ашылу салтанатына Алматы әкімінің орынбасары Азамат Қалдыбеков, қазақстандық ғалым физика-математика ғылымдарының докторы Асқар Жұмаділдаев, мектеп ұстаздары, оқушылар мен ата-аналар қатысты.
- Былтыр Алатау ауданында 10,5 мың балаға арналған жаңа 5 мектеп ашылды. Осы жылы Президентіміз Қасым-Жомарт Тоқаев бастаған “Жайлы мектеп” Ұлттық жобасы аясында 6 мектептің құрылысы жүріп жатыр. Одан бөлек қалалық әкімшілік “Саялы” және “Зерделі” ықшам аудандарында 2 мектептің құрылысын жүргізіп жатыр. Жалпы аудандағы орын тапшылығы мәселесі биыл толығымен шешіледі. Бүгін сіздерді қала әкімі Ерболат Досаевтың атынан құттықтай отырып, әкімшілік осы мектептің ауласына абаттандыру жұмыстарын өз мойнына алатынын хабарлаймын, - деді Азамат Қалдыбеков.
“NurOrda” мектебінің директоры Мехмет Желал Жан білім ордасында 500-ден астам бала білім алатынын атап өтті.
- “NurOrda” мектеп-лицейі биыл ашылып жатыр. Негізі 800 оқушыға арналған, бірақ қазіргі таңда 1-10 сыныптар аралығындағы 525 оқушы білім алғалы отыр. Оқушыларға сағат 8:30-дан 17:30-ға дейін қарауымызда болады. Күніне үш мезгіл балалар осында тамақтанады. Бізде 20-ға жуық үйірмелеріміз бар, - деді ол.
