Алматы қаласында 2025 жылдан бастап мүгедектігі бар адамдарды жұмыс орнында алып жүру және бейімдеу үшін «JOBCOACH» жобасы іске қосылды.
Жоба 2030 жылға дейін жалғасады және алғашқы жылы 300 адамды қамту жоспарланған. Бұл бастама мүмкіндігі шектеулі жандарға жұмыс орнында қолдау көрсету арқылы олардың еңбек нарығына белсенді араласуына жағдай жасайды.
Сонымен қатар, әлеуметтік қолдау шаралары аясында Атаулы әлеуметтік көмек (АӘК) бағдарламасы бойынша 14 810 адамға жалпы көлемі 1,6 млрд теңге төлем жүргізілді. АӘК алушы отбасылардың 4 727-ден астам баласы үшін қосымша көмек ретінде тамақ пен тұрмыстық химия өнімдерін сатып алуға 5 538 теңге мөлшерінде төлем берілді.
Бұл шаралар әлеуметтік әл-ауқатты арттыру және мүгедектігі бар адамдар мен аз қамтылған отбасыларға қолдау көрсетуді көздейді. Алматы қаласы әкімдігінің бастамалары қоғамдағы осал топтардың өмір сапасын жақсартуға бағытталған маңызды қадам болып табылады.