«Қауіпсіз жол» жедел-алдын алу іс-шарасы аясында алматылықтар жолдағы қауіпсіздікті қамтамасыз ету үшін белсенді жұмыс істеп жатыр.
Әсіресе мопед пен мотокөлік иелері ерекше назарға алынған. 2025 жылдың 5 сәуірінен бастап оларға қойылатын жаңа ереже күшіне енді, деп хабарлайды aqshamnews.kz.
Өңірлік коммуникациялар қызметінде өткен баспасөз-конференциясында, Алматыдағы полиция департаментінің өкілі Салтанат Әзірбек осылай деп хабарлады.
Салтанат Әзірбектің айтуынша, енді мопед жүргізетіндер тиісті санаттағы жүргізуші куәлігін, мемлекеттік тіркеу нөмірін, техникалық паспорт пен сақтандыру полисін алып, көлігін техникалық байқаудан өткзуі тиіс.
«Бұларды заңды орындау үшін ғана емес, адам өмірін аман сақтап қалу үшін де қолға алып отырмыз. Бұл жол апатын азайтып, тәртіпті күшейтуге бағытталған», - деп атап өтті Салтанат Әзірбек.
Оның айтуынша, түсіндірме жұмысын жүргізіп жатқанымен, заң бұзатындар әлі де азаймай отыр. Соңғы аптада Алматыда осындай 1,5 мыңнан астам заң бұзушылық тіркеліпті. Оның ішінде мопедін уақытылы тіркемегендер, жүргізуші куәлігі жоқтар, көлікті мас болып жүргізгендер мен басқа да заң бұзғандары да бар.
Бұлардан бөлек, Алматыда осы мопедшілердің кесірінен 233 жол апаты болып, 243 адам зардап шеккен. 500-ге жуық мопед айып тұрағына қойылған.
«Жолда абайлап жүрмесе болмайды. Ол мопед, машина деп ешкімді бөлмейді. Сондықтан жол жүру ережесін сақтау – әркімнің азаматтық борышы болуы тиіс», - деп қосты Салтанат Әзірбек.
Дегенмен, заңға бағынған 12 мыңнан астам адам көлік құралын заңдастырып, мемлекеттік тіркеу нөмірін, жүргізуші куәлігін алып, сақтандыру полисін рәсімдеп үлгерген.
«Алматының полициясы әлі де рейдке шығып, түсіндірме жұмысын жүргізіп жатыр. Біздің талап – қатаң, бірақ бәрі заң аясында болмақ. Мақсатымыз – жол қатынасын барынша қауіпсіз қылу», - деп қорытты жиынның соңында Салтанат Әзірбек.