Алматы қаласында мемлекеттік қызметтер жәрмеңкесі ұйымдастырылып, мыңнан астам қала тұрғыны мамандардан кеңес алды.
Бұл іс-шараны Медеу ауданының әкімдігі мен ҚР Мемлекеттік қызмет істері агенттігі ұйымдастырды, деп хабарлайды aqshamnews.kz.
Жәрмеңке мегаполис тұрғындарына бір алаңда түрлі мемлекеттік қызметтер туралы ақпарат алуға мүмкіндік берді.
Іс-шараның өтетін орны кездейсоқ таңдалған жоқ. Көк базар – қаладағы ең көп баратын орындардың бірі, ал бізге мүмкіндігінше көп адамды ақпараттандыру маңызды болды. Мамандардың халықпен кездесуі Мемлекеттік қызмет істері агенттігінің бастамасымен ұйымдастырылды. Жәрмеңкеге 30 мемлекеттік орган қатысып отыр.
"Жалпы, акиматқа қала тұрғындары түрлі мәселелер бойынша жиі жүгінеді: мүлікті заңдастыру және рәсімдеу, әлеуметтік қызметтер алу. Коммуналдық қызметтер бойынша да бірқатар сұрақтар бар, сондықтан біз іс-шараға «Алматы су» МКК өкілдерін шақырдық. Біздің ауданның тұрғындары уақтылы ақпарат алып, сапалы мемлекеттік қызметтер алуы маңызды. Медеу ауданында шамамен 230 мың адам тұрады, оның ішінде шамамен 30 мың зейнеткер, 3 мыңға жуық мүгедек, шамамен 2,5 мың көпбалалы ана бар", – деді Медеу ауданы әкімінің орынбасары Айдос Нұрлыбаев.
Іс-шараға ХҚКО, АХАТ, әлеуметтік қамсыздандыру бөлімі, Алматының мансап орталығы және басқа да мекемелердің өкілдері қатысты.
Алматылық Салтанат Жаналиева мектеп және тұрғын үй беру мәселелері бойынша бірқатар сұрақтарға жауап алды.
- Білікті мамандардан толық кеңес алдым, жауаптарға ризамын. Барлығы түсінікті, рахмет. Мұндай іс-шаралар халық үшін пайдалы деп есептеймін, әсіресе уақыт үнемдеу тұрғысынан тиімді. Қазір бір жерде бірнеше мемлекеттік орган шоғырланған, соның арқасында өз мәселелерімді бір сағатқа жетпейтін уақытта шешіп алдым, ал мемлекеттік мекемелерді жеке-жеке аралау бір күнге созылады, – деп бөлісті өз пікірін тұрғын.
Мемлекеттік қызмет істері агенттігі департаментінің мемлекеттік қызметтерді басқару басқармасының басшысы Мақсат Жаңбыршиев халықпен кездесу «Естуші мемлекет» тұжырымдамасын іске асыру аясында өткізіліп жатқанын атап өтті.
Айта кетейік, бұл биылғы жылы өткізілген алтыншы мемлекеттік қызметтер жәрмеңкесі. Ұйымдастырушылардың айтуынша, қаланың әртүрлі аудандарында осындай тағы екі іс-шара өткізу жоспарлануда