Алматы қаласында ҚР ҰҚК Алматы қаласы бойынша департаментінің Терроризмге қарсы орталығының ұйымдастыруымен мектеп оқушылары арасында «Біз терроризмге қарсымыз!» тақырыбында сурет салу байқауы өтті, – деп хабарлайды aqshamnews.kz тілшісі.
Іс-шараның негізгі мақсаты – жасөспірімдер арасында терроризмге қарсы көзқарасты қалыптастыру, ақпараттық сауаттылық деңгейін арттыру және бейбітшілік пен қоғамдық тұрақтылық құндылықтарын насихаттау. Байқау барысында қатысушыларға «Біз терроризмге қарсымыз!» жазуы бар арнайы баннер дайындалып, телеэкран арқылы қарсы насихаттық бейнероликтер көрсетілді.
Оқушылар өздерінің салған суреттерін комиссия мүшелеріне таныстырып, тақырып бойынша ашық пікір алмасуға қатысты.
Іс-шараға ҚР ҰҚК Алматы қаласы бойынша департаментінің басшылығы, қала прокуратурасы, полиция департаменті, сондай-ақ білім, спорт және дін істері басқармаларының өкілдері қатысты.
Байқау қорытындысы бойынша жеңімпаз атанған оқушыларға ұйымдастырушылар тарапынан грамоталар мен бағалы сыйлықтар табысталды. Іс-шара жасөспірімдердің терроризмнің алдын алу мәселелері туралы хабардарлығын арттырып, қоғамда бейбітшілік пен қауіпсіздік құндылықтарын нығайтуға ықпал етті.