Алматылық түлектерге аттестаттарды салтанатты түрде тапсыру 2022 жылдың 16-17 маусымында өтеді.
Алматы қаласы білім басқармасы басшысының орынбасары Қайрат Жұманов Өңірлік коммуникациялар қызметінің брифингінде биылғы жылы мегаполисте мектеп бітіру қалай өтетіні туралы айтып берді, деп хабарлайды Almaty-akshamy.kz.
«25 мамырда барлық түлектер үшін соңғы қоңырау соғылды. Бітіру іс-шаралары – бұл 11-сынып түлегі үшін оның ересек өмірге қадам басуындағы айтулы оқиға», - деп атап өтті Қайрат Жұманов.
Ол аттестаттарды салтанатты тапсыру 2022 жылғы 16-17 маусымда өтетінін хабарлады.
«Алматы қаласында аттестатты міндетті түрде күндізгі уақытта мектеп қабырғасында тапсыру дәстүрі қалыптасқан, оған мектептің педагогикалық ұжымы, түлектер, түлектердің ата-аналары, педагогикалық еңбек ардагерлері, Қамқоршылық кеңес мүшелері, Алматы қаласы білім басқармасының және басқа да мүдделі мемлекеттік органдардың өкілдері қатысады», - деп атап өтті спикер.
Қ.Жұманов түлектердің қайырымдылық бастамаларын - «Мектепке кітап сыйла», «Мектепке сый» - ағаш отырғызу, әлеуметтік осал отбасылар мен балаларға көмек көрсету үшін «Мейірімді жүректен – балаға», «Туған жерге тағзым» акцияларын қолдайтынын жеткізді.
Педагогикалық әдепті сақтау және сыбайлас жемқорлық құқық бұзушылықтардың алдын алу мақсатында мектеп бітіру іс-шараларына дайындық кезінде әрбір түлекке жеке көзқарас қағидаты сақталады; бітірушілердің ата-аналарымен қажетсіз шығындардың орынсыздығы туралы түсіндіру жұмыстары жүргізіледі.
Алматы қаласы білім басқармасы басшысының орынбасары мектеп бітіру кешіне қойылған тыйым туралы да еске салды. Сонымен іс-шараларды өткізуге аниматорларды, мерекелік агенттіктерді тартуға; мерекелік үстелдерді ұйымдастыруға; автомобильдерді жалға ала отырып, қала бойынша экскурсияларды өткізуге; әкімшілік пен педагогтарға сыйлықтар үшін ақшалай қаржы жинауға; мейрамханалар мен кафелерде мектеп бітіру іс-шараларын ұйымдастыруға жол берілмейді.