Өткен демалыс күндері Алматы қаласында жол қозғалысы ережелерін өрескел бұзу фактілерін анықтауға бағытталған кең ауқымды рейд ұйымдастырылды.
Жергілікті полиция қызметінің мәліметінше, алдын алу шарасы барысында мас күйінде көлік басқарған 27 жүргізуші ұсталды, деп хабарлайды aqshamnews.kz.
Сот олардың әрқайсысына қатысты әкімшілік жаза тағайындап, кемінде 15 тәулікке қамауға алу және 7 жылға көлік басқару құқығынан айыру туралы шешім шығарды.
Алматы қалалық полиция департаментінің жергілікті полиция қызметі басқармасының басшысы Серік Шумаевтың айтуынша, көлікті мас күйінде тізгіндеу ауыр зардаптарға әкелетін құқық бұзушылықтардың бірі.
- Тәжірибе көрсеткендей, есірткі немесе алкоголь қолданған жүргізушілер әлі де кездеседі. Мұндай жағдайларда жиі кездесетін сценарий: бір топ адам бірге ішімдік ішеді, содан кейін жүргізуші көлікпен үйіне қайтуға шешім қабылдайды. Ол өзіне тым сенімді болып, еш қиындықсыз жете алатынына сенеді. Алайда өкінішке қарай, мұндай жағдайлар көбінесе ауыр жол-көлік оқиғаларымен аяқталып жатады. Мас жүргізушілер тоқтатылған кезде, олар түрлі сылтау айтып, жауапкершіліктен құтылуға тырысады. Бірі дәрі ішкенін алға тартса, енді бірі тек аз ғана жол жүргенін айтады. Бірақ бұл жерде ешқандай ақталу болмауы керек. Егер адам мас болса, ол рөлге отырмауы тиіс. Әйтпесе, қайғылы жағдай орын алуы мүмкін. Бұл – өмірдің ащы шындығы: мас жүргізуші – қылмыскер", – деп атап өтті ол.
Демалыс күндері алдыңғы шептегі полиция бөлімшелері 112 жол қозғалысы ережесін бұзу дерегін анықтады. Оның ішінде: 27 – көлік құралын мас күйінде басқару, 1 – жүргізу құқығы жоқ адамның көлік жүргізуі, 16 – қарама-қарсы қозғалыс жолағына шығу, 20 – маневр жасау ережесін бұзу, 10 – апаттық жағдай туындату, 20 – көлікті тұраққа қою ережесін бұзу, 2 – мемлекеттік тіркеу нөмірі жоқ көлік құралын басқару. Алматы қалалық полиция департаменті көлік жүргізушілерін жол қозғалысы ережелерін қатаң сақтауға шақырады. Мас күйінде рөлге отыру – өз өміріңе де, өзгенің өміріне де қауіп төндіретін ауыр құқық бұзушылық.