Жұмысшы мамандықтарының беделін арттыру, жастарға кәсіби бағдар беру, еңбекке баулу және тәжірибелік дағдыларды дамыту мақсатында ұйымдастырылған «Мамандық әлемі» атты кезекті шеберлік сабақ өтті, - деп хабарлайды Aqshamnews.kz.
Шара «Жұмысшы мамандықтар жылы» аясында, Алматы қаласы Ішкі саясат басқармасының Қоғамдық даму орталығының бастамасымен қолға алынған WORKSHOP «Еңбек пен шеберлік» жобасының жалғасы ретінде өткізілді. Бұл жерге қаладағы оқу орындарының студенттері мен оқушыларының қатысуымен «Алматы жиһаз фабрикасында» ұйымдастырылды.
Фабрикадағы шеберлік сабағы теориядан гөрі іс жүзіндегі білім мен тәжірибеге басымдық берді. Кәсіпорынның жетекші мамандары жастарға ағаш өңдеу, бөлшектерді дәл өлшеу, бұйым құрастыру және сапаны бақылау секілді нақты дағдыларды көрсетті. Қатысушылар өз қолымен шағын бұйымдар жасап, өз еңбегінің нәтижесін көрудің қуанышын сезінді. Кәсіби мамандардың қасында жүріп, құрал-жабдықтармен жұмыс істеуді үйрену, әр процестің мәнін түсіну — жастар үшін жаңа тәжірибе ғана емес, өз қабілетін танып, болашақ мамандығына қызығушылық оятудың тиімді жолы болды.
Іс-шара барысында қатысушылар тек тыңдап қана қоймай, сұрақ қойып, пікір алмасып, өз ойларын ортаға салды. Бұл – әдеттегі дәріс емес, нақты өмірмен ұштасқан тәжірибелік диалог алаңы болды. Көптеген оқушы өз болашағы туралы ойланып, еңбек нарығындағы сұранысқа ие салаларға қызығушылық танытты. Осындай форматтағы сабақтар жастардың кәсіби бағдар алуына және өз қабілетін тануға нақты мүмкіндік береді.
Жоба еңбек адамының мәртебесін арттырумен қатар, жас буынның бойына табандылық, төзімділік және еңбекқорлық сияқты қасиеттерді сіңіруге бағытталған. Бұл – елдің өндірістік әлеуетін арттыруға, кадрлық тапшылықтың алдын алуға және «еңбек адамын үлгі ету» идеясын қоғам санасына сіңіруге арналған кешенді қадам.