Алматы әкімі Дархан Сатыбалды қаланың көшкін қаупі бар учаскелерінде жүргізіліп жатқан жұмыстар бойынша кеңес өткізді.
Сейсмикалық қауіпсіздік және жұмылдыру дайындығы басқармасының басшысы Ерік Жұмабай баяндама жасады. Басқарма басшысының мәліметінше, қала шегінде көшкін қаупі бар учаскелер анықталған. Төтенше жағдайлардың алдын алу мақсатында бірқатар учаскеде инженерлік жұмыстар басталып, техникалық шешімдер әзірленіп, тұрақты мониторинг жүргізіліп жатыр.
Жұмыс комиссиясының мәліметінше, 2024 жылы Алматыда 28 көшкін қаупі бар учаске анықталған. Оның 14-де аудан әкімдіктерінің қаржысы есебінен нығайту жұмыстары аяқталды. Бес нысан бойынша жерді сатып алу рәсімі жүргізіледі. Тағы төртеуінде қала құрылысын бақылау басқармасының талабы бойынша меншік иелері беткейлерді нығайту бойынша жұмыстар жүргізіп жатыр.
2025 жылы ең қауіпті 9 учаскедегі төтенше жағдайларды жою жоспары бекітілді. Олардың әрқайсысы бойынша География және су қауіпсіздігі институтының сараптамалық қорытындысы алынды.
Қауіпті нысандардың қатарына «Медеу» мұз айдынының жанындағы беткей, Медеу ауданындағы Шымбұлақ пен Кеңсай-2-дегі автожол, Бостандық ауданындағы Алма-Арасан жолы; Наурызбай ауданындағы Усиков көшесі және «Ақжартау» бау-бақша қоғамы, сондай-ақ. Жетісу ауданындағы Кемел шағынауданындағы зират жанындағы өзен арнасы, Қожамияров көшесі бар.
Іс-шаралар кешеніне тіреу қабырғаларын салу, тростық-торлы құрылымдарды монтаждау, су бұру арналары мен өзен арналарын нығайту кіреді. Кеңеске ТЖД, Қазселденқорғау, География институты, аудан әкімдіктері мен тиісті басқармалардың өкілдері қатысты.
Қала әкімі жобалық-сметалық құжаттаманы әзірлеуді аяқтауды, әсіресе, тұрғын үйлер мен көлік инфрақұрылымына іргелес учаскелерде шараларды іске асыруға кірісуді тапсырды.
«Көшкін қаупі бар әрбір учаске аудан әкімдерінің жеке бақылауында болуға тиіс. Бұл жай ғана абаттандыру мәселесі емес, бұл тұрғындардың қауіпсіздік мәселесі», – деді Дархан Сатыбалды.
Кеңес қорытындысы бойынша мониторингті күшейту, жобалық рәсімдерді жеделдету және төтенше қызметпен үйлестіру жөнінде тапсырма берілді.