Алматыда әлеуметтік желіде тараған бейнематериалдағы арандатушы мәлімдемелер үшін авторы мен қатысушысы әкімшілік жауапкершілікке тартылды, деп хабарлайды Aqshamnews.kz тілшісі.
Қалалық полиция департаментінің мәліметінше, сұхбат барысында Қазақстан заңнамасына қайшы келетін, сондай-ақ қоғамдық сана мен конфессияаралық келісімге кері әсер етуі мүмкін пікірлер айтылған. Осыған байланысты аталған сөздерді айтқан азамат ҚР ӘҚБтК-нің 490-бабы бойынша айыппұл арқалады.
Ведомство оның ресми діни қызметкерлер қатарына жатпайтынын атап өтті. Сонымен қатар, заң талаптарын бұзатын материалды таратқаны үшін жарияланым авторы да жауапқа тартылған.
Полиция өкілдері қоғамдағы тұрақтылыққа нұқсан келтіруі мүмкін және заңға қайшы контентті таратуға жол берілмейтінін ескертті.