Алматы қаласының Медеу ауданындағы комьюнити-орталықта Конституция күніне арналған көрме өтті, деп хабарлайды aqshamnews.kz.
Іс-шараға қала жастары, «Ассоциация Жастары» қозғалысының белсенділері және қарапайым қала тұрғындары қатысты. Орталықтың холында Қазақстан Конституциясының дамуы мен қалыптасу кезеңдерін көрсететін фотокөрме ұйымдастырылды.
Қонақтарға негізгі заңның құрылуы туралы деректі фильм көрсетілді, содан кейін қатысушылардан сауалнама алынып, шара викторинамен аяқталды. Викторина жеңімпаздарына сыйлықтар табысталды.
Бұл іс-шара Медеу ауданында ұйымдастырылған онкүндіктің қорытындысы болды. Онкүндік аясында челлендждер, Конституция туралы білімдерін тексеру үшін тұрғындар арасында сауалнамалар, викториналар және Орталық мәдениет және демалыс саябағында мерекелік концерт өткізілді. Комьюнити-орталықтың басшысы Рустам Қайрыевтың айтуынша, іс-шараның мақсаты — жастардың Конституцияда бекітілген құқықтары мен міндеттері туралы білімін арттыру.