Алматыда көліктерді заңсыз тіркеушілердің қылмыстық әрекеттері анықталды.
Ішкі істер министрлігіне қарасты ұйымдасқан қылмысқа қарсы күрес бөлімі прокуратураның қолдауымен құжаттарды жалған жасау және көлік құралдарының идентификациялық нөмірлерін өзгертуге қатысты ауқымды операция жүргізген, деп хабарлайды aqshamnews.kz.
Операция барысында көліктердің VIN-кодтарын бұзатын құпия цех табылды. Жалпы алғанда, заңсыз тіркеуге қойылған 150-ден астам көлік анықталды.
"Арнайы халыққа қызмет көрсету орталықтарының қызметкерлері мен «делдалдар» осы қылмыстық әрекеттерге қатысы бар екені белгілі болды. Әрбір «дроппер» арқылы 50-ге дейін көлік рәсімделген. Барлығы 17 адам ұсталды. Қазіргі уақытта қылмыстық істер бойынша заттай дәлелдер тәркіленіп, халыққа қызмет көрсету орталықтарының қауіпсіздік қызметімен бірге тексеру жалғасуда", - деді ішкі істер министрлігінің ұйымдасқан қылмысқа қарсы күрес департаментінің өкілі Қуандық Алпыс.
Алдын ала болжам бойынша шығын 320 миллион теңгеден астам қаражатты құрайды. 17 қылмыстық іс қозғалып, оған алаяқтық, құжаттарды жалған жасау және есепке алу базаларына жалған мәлімет енгізу айыптары тағылған.